Giza Eskubideen Defendatzaileak Babesteko Euskal Programa Biktimen eta Giza Eskubideen Zuzendaritzak zuzentzen du, eta CEAR-Euskadik kudeatzen du. Programaren helburu nagusia da beren jatorri-herrialdeetan gauzatzen duten jarduera dela-eta bizitza edo osotasun fisikoa arriskuan ikusten duten giza eskubideen defendatzaileak babestea; horretarako, harrera egiten zaie Euskadin, sei hilabetez.

 

Honako ekintza hauek barne hartzen ditu:

Laguntza psikosoziala

Programa babesaren ikuspegi integraletik dago garatuta; horrenbestez, alderdi pertsonalak, antolakuntzari dagozkionak eta politikoak barne hartzen ditu. Laguntza terapeutikoa ematen zaie indarkeria politikoaren eraginez arreta berezia behar dutenei. Bestalde, beren gaitasunak eta beren erakundeenak indartzen laguntzen diegu, haien segurtasuna eta babesa areagotzeko jatorri-herrialdera itzuli behar dutenean.

Agenda politikoa

Euskadin igarotzen duten aldian egiten duten lanaren helburua da pertsona horien eta beren erakundeen babes instituzional eta politikorako nazioarteko sareak zabaltzea eta sendotzea. Sare horiek, praktikan, babes-mekanismo funtzioa betetzen dute, eta euren herrialdean egindako giza eskubideen aldeko lanari jarraipena ematea ahalbidetzen diete. Horri esker, euskal herritar eta erakundeak, eta, hala badagokio, baita Espainiakoak eta Europakoak ere, sentsibilizatzen dituzte, eta haien aurrean agerian jarri eta salatzen dituzte giza eskubideak defendatzen dituzten erakundeek jasaten duten mehatxu-egoera. Horrez gain, tarte hori baliatzen dute gai honen inguruko aldarrikapenak egiteko.

 

Prestakuntza-agenda

Programarekin bat egiten duten pertsonek lan-ibilbide aintzatetsia izaten dutenez, hizlari gisa ere parte hartzen dute espazio akademiko nahiz sozialetan.

Casa de la Memoria, CALDH (Guatemalako Hiria)

Itzulerako segimendua

Hemen egondako pertsonak beren jatorri-herrialdeetara itzuli ondoren, euskal ordezkaritza bat bertara joaten da, haien egoera pertsonalaren eta komunitate-egoeraren segimendua egiteko, haien babes- eta segurtasun-sarea sendotzeko eta EAEn Jaurlaritzaren, Legebiltzarraren eta erakundeen aldetik jaso duten babesa agerian jartzeko.

Bisitaldian bilera ugari egiten dituzte erakunde sozialekin eta giza eskubideen aldekoekin, erakunde publikoekin, nazioarteko erakundeekin eta ordezkaritza diplomatikoekin; hartara, gurean izan ditugun pertsonen eta haien erakunde edo mugimenduen segurtasunarekiko kezka nagiak helarazten dizkiete.

Hemen ikus ditzakezu orain arte egindako Segimendu Ordezkaritzen txostenak