Ilustrazioa: Higinia Garay

Genero-arrazoiengatiko jazarpena gertatzen da giza eskubideen urraketa larri edo sistematikoek zerikusia dutenean pertsona batek bere genero-nortasunagatik (emakumea, gizona, trans edo beste batzuk) esleituta duen rolarekin. Baita jazarpena bere sexu-lehentasunengatik gertatzen denean ere. Kasu batzuetan, pertsona batzuek beren herrialdeetatik ihes egin behar izaten dute, arrazoi horien ondorioz jazarpena jasaten dutelako, eta nazioarteko babesa eskatzen dute.

Egungo Asiloaren Legeak (12/2009 Legea, urriaren 30ekoa, Asiloa eta babes subsidiarioa arautzen duena) ezartzen duenez, generoaren eta sexu-orientazioaren ondoriozko jazarpena asiloa emateko arrazoi gisa hartu behar da. Bilakaera egon da aurreko legeriatik, lehen ez baitzen halako aitorpen formalik jasotzen, eta aurrerapauso handia izan da emakumeen eta gizonen arteko berdintasunerako eta lesbiana, gay, transexual, transgenero, bisexual eta intersexualek (LGTTBI) jasaten dituzten indarkerien aitorpenerako bidean.

Alabaina, badago aitorpen hori baldintzatzen duen termino juridiko bat: “jatorrizko herrialdeko inguruabar nagusiak”. Alegia, genero-arrazoiengatiko jazarpena jaso dutela adierazten duten pertsonei ez zaie babesa automatikoki ematen; jatorrizko herrialdeko egoera baloratzen da, eta egoera horren arabera erabakitzen da nazioarteko babesa behar duten edo ez.

CEAR-Euskadi aitzindaria da borroka honetan. Arrazoi horrengatik jazarritako pertsonak babesteko asilo-eskubidea aldarrikatzen dugu, eta sexu- eta ugalketa-eskubideak funtsezkoak direla defendatzen dugu.

Emakumeak

Ilustrazioa: Higinia Garay

Hamar urte baino gehiago daramatzagu sistema patriarkalaren ondorioz indarkeria jasaten duten emakumeentzako asilo-aitorpenaren alde borrokan. Hainbat emakumek jazarpena jasaten dute, emakumeak direlako edo beren eskubideak defendatzeko jarduera politikoak gauzatzen dituztelako. Askotariko kasuak daude: feminizidioa, emakumeen genitalen mutilazioa, ezkontza behartua, salerosketa, jazarpena feministei eta beren gorputzari buruz erabakitzeko eskubidea defendatzen dutenei, etab.

Emakume errefuxiatuen balioespenaren eta duintasunaren alde lan egiten dugu, eta haien ahalduntzea eta eskubide nahiz aukeren berdintasuna sustatzen ditugu. Horrez gain, genero-arrazoiengatiko jazarpenaren arloko asilo-politikan eragina izan nahi dugu, eta euskal gizarteko eragile estrategikoak sentsibilizatu.

LGTBI

CEAR-Euskadin genero-ikuspegiari eta sexu-aniztasunari buruz hausnartzen dugu, genero-indarkeriek lesbiana, gay, trans, bisexual eta intersexualengan duten eragina ere agerian jartzeko eta salatzeko.

Esparru honetako ikerlan aipagarriak

  • Genero-arrazoiengatiko jazarpena eta asilo-eskubidea: testuinguru globaletik tokiko konpromisora
  • Ekintzarako informazioa: esparru juridikoko eragileen zeregina Genero Arrazoiengatiko Jazarpenaren aurrean

 

Informazio gehiago aurki dezakezu gure Genero-arrazoiengatiko jazarpenari eta asilo-eskubideari buruzko gidan