2019ko abuztuaren amaieran ireki zenetik, nazioarteko babesa eskatzen dutenentzako “Zuloaga Txiki” lehen harrerako zentroak 110 pertsona artatu ditu, 22 nazionalitatekoak: Mendebaldeko Sahara, Kolonbia eta Maroko dira nagusiak, baina Zuloaga Txikitik pasa dira, baita ere, Venezuela, Nikaragua, Honduras, Ginea, Mali edo Argentinakoak ere, besteak beste. Tolosan dago Zuloaga Txiki, eta CEAR-Euskadik kudeatzen du. Eusko Jaurlaritzako Berdintasun, Justizia eta Gizarte Politika Sailak finantzatzen du, eta herriko Udalaren babesa du, instalazioen erabilerari dagokionez.Zentroko zuzendari eta CEAR-Euskadiko esku-hartzearen arduradun Arantza Chaconek azaldu duenez, “helburua da iritsi berri diren pertsonei asilo-prozesuan espazio segurua, laguntza juridikoa eta akonpainamendua eskaintzea, baita arreta medikoa edo oinarrizko eskubideak izateko beharrezkoa den beste edozein arreta ere. Osasun-arreta, pandemia-garaian bereziki garrantzitsua, eskualdeko lehen eta bigarren mailako arreta-zerbitzuekin koordinatzen da”.

Profilak askotarikoak dira, baina gehienak gizonezkoak dira (% 77 gizonezkoak eta % 23 emakumezkoak). Ardurapean adingabeak dituzten familiak ere artatu dira. Ireki zenetik, 15 adingabe pasa dira Zuloaga Txikiren instalazioetatik. Nazioarteko babesa eskatzen duen pertsonak artatzen dira, fase ezberdinetan daudenak; aberrigabeak, asilo-espedientea ukatzeko ebazpena jakinarazten zaien pertsonak eta egoera ahulean dauden bestelako profilak. Egonaldia, batez beste, 4 hilabetekoa da. Gaur egun, zentroan 20 pertsona daude.

Balantze hau zentroan bertan egin da, prentsarekin egindako bisita gidatu baten baitan. Bisita horretan parte hartu dute Eusko Jaurlaritzako Berdintasun, Justizia eta Gizarte Politiketako sailburu Beatriz Artolazabalek, Eusko Jaurlaritzako Migrazio eta Asilo zuzendari Xabier Legarretak, Tolosako alkate Olatz Perónek eta CEAR-Euskadiko zuzendari Patricia Barcenak.

Barcenak nabarmendu duenez, “CEAR-Euskadiren 25 urte hauetan zehar gogor egin dugu lan asilo-eskubidearen eta harrera-eredu bat eratzearen alde, hain zuzen, Euskadira babes bila datozen pertsona guztien beharrei erantzuteko harrera-ereduaren alde”. Era berean, gogorarazi duenez, “Zuloaga Txiki harrera-eredu malgu horren tresna da, eta funtsezkoa da pertsonak beren bizitza berreraiki eta komunitatearen parte izan daitezen gure herri, auzo eta hirietara iritsi ondoren. Hala, zentro honetatik eta hainbaten laguntzarekin eta parte-hartzearekin (boluntario-taldeak, Eskola Irekia, Zutani, Helduen Eskola (HHI) eta beti ateak irekitzen dizkiguten pertsonak eta lan-taldeak), proiektu berriak sortzearen aldeko apustua egingo dugu, errefuxiatuen gizarteratzea, komunitate-garapena eta kulturen arteko bizikidetza sustatzeko.

Zentroaren aurkezpena Errefuxiatuen Nazioarteko Egunaren bezperetan egin da (ekainak 20). Erakundearen ordezkariek gogorarazi dute igande honetan manifestazio deialdiak daudela 12.00etan Bilbon (Arriaga Plazatik), Gasteizen (Andra Mari Zuriaren Plazatik) eta Donostian (Aquariumetik).